ಒಂಟಿ ಕಾಲಲ್ಲಿ ಯಕ್ಷಗಾನ ಕುಣಿತ, ವಿಶೇಷ ಪ್ರತಿಭೆ ಅಗಣಿತ!
ಲೇಖಕರು : ಸತೀಶ್ ನಾಯಕ್ , ಪಕಳಕು೦ಜ
ಗುರುವಾರ, ಜನವರಿ 1 , 2015
|
|
ಜನವರಿ 1, 2015
|
ಒಂಟಿ ಕಾಲಲ್ಲಿ ಯಕ್ಷಗಾನ ಕುಣಿತ, ವಿಶೇಷ ಪ್ರತಿಭೆ ಅಗಣಿತ!
ಉಡುಪಿ :
ನೀಲ ಗಗನದೊಳು ಮೇಘಗಳ ಕಂಡು, ನವಿಲು ಕುಣಿಯುತಿದೆ ನೋಡೆ...ಸಖಿ ನೋಡೇ...ಚಂಡೆ, ಮದ್ದಳೆಯ ನಾದದ ನಡುವೆ ಭಾಗವತರ ಕಂಠದಿಂದ ಹಾಡು ಮೊಳಗುತ್ತಿದ್ದಂತೆ ಈ ವಿಶೇಷ ವ್ಯಕ್ತಿ ತಮ್ಮ ಅಂಗ ವೈಕಲ್ಯವನ್ನೂ ಲೆಕ್ಕಿಸದೆ ಒಂಟಿ ಕಾಲಲ್ಲೇ ಕುಣಿದು ತಮ್ಮ ಪ್ರತಿಭೆ ತೋರಿದರು.
ಕಲ್ಸಂಕದ ರಾಯಲ್ ಗಾರ್ಡನ್‌ನಲ್ಲಿ ಉಡುಪಿ ಉತ್ಸವದಂಗವಾಗಿ ಕರ್ನಾಟಕ ರಾಜ್ಯ ವಿಕಲ ಚೇತನರ ಮಹಾಸಂಘಗಳ ಒಕ್ಕೂಟದ ವತಿಯಿಂದ ಕೆ. ಜಗದೀಶ್ ಭಟ್ ಅಂಬಲಪಾಡಿ ಮತ್ತು ಬಳಗದಿಂದ ಇತ್ತೀಚೆಗೆ 10 ನಿಮಿಷಗಳ ವನ ವಿಹಾರ ಯಕ್ಷಗಾನ ರೂಪಕ ಪ್ರದರ್ಶಿಸಲಾಯಿತು.
ಜಗದೀಶ್ ಭಟ್ ಅವರು ಮುಖತೋ ಪೂರ್ಣಚಂದ್ರಶ್ರೀ, ನೇತ್ರ ಪದ್ಮದಳಾಕೃತಿ ಹಾಡಿಗೂ ನರ್ತಿಸಿದರು. ಚಂದ್ರಕಾಂತ್ ಭಟ್(ಭಾಗವತಿಕೆ), ಶಶಿಕಾಂತ್ (ಮದ್ದಳೆ), ಸತೀಶ್ ಉಪಾಧ್ಯಾಯ (ಚಂಡೆ) ಸಹಕರಿಸಿದರು. ಅಷ್ಟಮಿ ಸಂದರ್ಭ ಹುಲಿ ವೇಷ ವನ್ನೂ ಹಾಕಿ ಕುಣಿದಿದ್ದ ಕೆ. ಜಗದದೀಶ್ ಭಟ್ , 15 ದಿನಗಳ ಕಾಲ ಸತೀಶ್ ಉಪಾಧ್ಯಾಯ ಅಂಬಲಪಾಡಿ ಅವರಿಂದ ಕುಣಿತ ಕಲಿತಿದ್ದರು.
ಕುಂದಾಪುರದ ವಾಗ್ಜ್ಯೋತಿ ಕಿವುಡ ಮತ್ತು ಮೂಗ ಮಕ್ಕಳ ಶಾಲೆಯ ವಿದ್ಯಾರ್ಥಿಗಳು ಈ ಹಿಂದೆ ಜಟಾಯು ಮೋಕ್ಷ ಯಕ್ಷಗಾನ ಪ್ರದರ್ಶನ ನೀಡಿ ಸೈ ಎನಿಸಿಕೊಂಡಿದ್ದರೆ, ಉಡುಪಿ ಮಾತ್ರವಲ್ಲ ರಾಜ್ಯದಲ್ಲೇ ಮೊದಲ ಬಾರಿಗೆ ವಿಕಲಚೇತನ ಕೆ. ಜಗದೀಶ್ ಭಟ್ ಯಕ್ಷಗಾನ ಪ್ರದರ್ಶಿಸಿದ್ದಾರೆ.
ಕೃಪೆ :
http://vijaykarnataka.com
|
|
|
